12 Janvye 2010

12 Janvye 2010

Fè n wè sa’k ka rive n’on ti bout tan 

Men li pa montre nou ki jan

Pou’n rive nou menm san’n pa pèdi tan

 

12 Janvye 2010

Jete poto, kase anpil fil electrik

Men, li te fè limyè lespwa briye pi klere nan nanm Ayiti

 

12 Janvye 2010

Sekwe tout bagay

Men, li pa sekwe reveye nou

Nan dòmi kanpe reve je louvri

 

12 Janvye 2010

Fè n dekouvri: Nou tou pre len ak lòt 

Men, li kouvri ak debri ti etensèl

Ki pou limen rega ayisyen sou ayisyen

 

12 Janvye 2010

Fè n wè aklè tout sa’n bezwen 

Men li bouche plòg ki pou konekte nou ak lesansyèl  

Ak sa nou reyèlman bezwen

 

12 Janvye 2010

Pwouve, tout solidè ayisyen ak etranje montre yo solidè nan pote èd dijans

Sinistre yo menm, toujou rete solitè, pou kont yo ak ti lo mizè yo

 

12 Janvye 2010

Fè nou wè, nou tout bezwen pen 

Men li pa aprann nou ki jan pou n koupe l, separe l

Pou tout pa al gonfle plen bouch nou sèlman

 

12 Janvye 2010

Devwale klè, ti valiz plat boure lajan èd imanitè

Pou ta ede sinistre pase plis nan fè fonksyone ONG

 

12 Janvye 2010

Pwouve, nou chak gen yon kwa n’ap pote nan lavi 

Men li pa anseye nou ak ki ladrès pou’n pliye l

San’n pa koupe l, fèl sèvi pon pou’n travèse move pas lavi

 

12 Janvye 2010

kraze brize anpil izin antrepriz nou te genyen

Men li pa kraze, li pa menm brenzeng pi gwo faktori tout ayisyen travay:

Faktori chirepit

Pale anpil

 

 

   Emmanuel Albert (Toto)