Koudfoud ou koutfouk

Salye!  Sa kap pase w la a?

Poze!  POZeee!

Ki jan w’ap vare sou yon fanm konsa a!

Jan w parèt anlè anlè la a

Se oubyen w’pran n’on koudfoud

Oubyen ou sou koutfouk

 Kiyès nan de a?

 

Si se koudfoud : konnen ou pran n’on kout loraj lanmou

Ki gwonde andan w, souke tout bonnanj  ou

Ou gade wè w tonbe san w’pa glise

W’ap tranble yon men w cho, yon men w frèt

Ou tèt koupe ak yon flanm dife kap valse brete nan gout lapli

Men, kalme w.  Poze san w. Metrize pasyon w

Kontwole tout jès emosyon w

Kè fanm se tankou yon bèl woz

Touche l, wouze l ak delikatès

W’ap jwenn pafen tandrès

 

Men, si se sou twa pye recho koutfouk ou kanpe, kite m’di w :

Sa w santi a se pa lanmou. S’on jete dlo ki kenbe w.

Sa kab mete anpil dlo nan je.

E, sa souvan pran anpil tan pou l seche

 

Tipouchon jènjan dyougan sediktè pwofesyonèl

Ki konn sa yo rele bay priyè chame sedui fanm, deklare di:

Tout etandi sipèfisi kò yon fanm se yon vwayaj

E, fanm nan limenm pou kont pa’l se yon peyi

Konsa yo vle vwayaje konn plis peyi chak kou pi plis

 

Chamè dyòl dous ki aplike prensip renmen sa a, yo rele yo:

Casanova: misye sedui li goute sere fè koleksyon mete la

Pandan je l gen tan brake kole al bat nan ke yon lòt jip.

Don juan: limenm fin sedui, jwi kont jwi l

Epi mache pòs li, al dèyè yon lòt pi nèf.

Cadet Jacques limenm metòd li se liyen

veye, sezi pran san yo pa ba li epi jete l doba

 

Antouka, anvan w chwazi  kiyès nan yo  ou wè k’sanble avè w, sonje:

Tout fanm, menm jan ak manman w, s’on flè yo ye

Yo pote semans lavi.

Epi, yo anbeli lavi.

Tout bote vi w se nan yon fanm li ye!

Pa drive yo! 

 

Emmanuel  Albert (Toto)