Bonjour à tous,
Dans le cadre de l'introduction du créole mauricien dans les écoles depuis janvier 2012, le Mauritian Kreol Unit du MIE est engagé dans la conception de matériels pédagogiques (manuels, recueils d'histoires...). Nous souhaitons inclure des textes d'auteurs (en créole mauricien) dans notre matériel. Ce matériel est destiné aux élèves du primaire étudiant le créole. Toute personne souhaitant contribuer de manière bénévole dans ce projet est bienvenue. Vous trouverez ci-joint l'appel à textes (en créole) qui comporte également un protocole de rédaction.
Apel a text
Prezantasion proze maniel Kreol Morisien
Avek lintrodiksion Kreol Morisien kouma enn size dan bann lekol depi Zanvie 2012, Younit Kreol Morisien dan MIE angaze aktielman dan enn travay konsepsion ek elaborasion maniel ek materyel pedagozik an Kreol Morisien ki pou servi dan bann lekol primer. Pou le moman, enn panel-redaksion pe travay lor maniel Std 2 ek apartir lane prosenn, travay redaksion pou bann maniel Std 3 amonte pou koumanse.
Mem si ena enn literatir an Kreol Morisien ki deza existe, li pa touzour adapte pou bann zanfan lekol primer. Savedir ki bann profeser ena tigit resours ekri a zot dispozision. Finn ena bann ekrivin ki finn manifeste zot dezir pou partisip dan proze maniel atraver bann kontribizion text. Pou sa rezon-la, Younit Kreol Morisien pe anvi ouver sa lapel-la a tou bann ekrivin ki ekrir an Kreol Morisien e ki ti pou kontan propoz zot text, de manier benevol.
Sak propozision pou examine par panel-redaksion ek pou kapav inklir swa dan maniel Std 2, Std 3-6 (a partir lane prosenn) ou bien dan enn materyel pedagozik separe (enn liv zistwar, etc.), si li zize apropriye pou enn litilizasion pedagozik.
Protokol redaksion
* Bann text ki propoze kapav swa enn poem, swa enn ti-zistwar pou bann zanfan. Pou maniel Std 2, nou pou bizin prioriterman bann text pou bann zanfan ant 6 ek 7 an.
* Longer sak text pou ant 100 – 200 mo (pou maniel Std 2). Pou bann nivo klas siperyer (3-6) bann text pou kapav al ziska 350 mo. Dan kad konsepsion enn rekey zistwar ki separe depi maniel, bann text pou kapav evantielman pli long.
* Sak text bizin inedi. Si enn text finn deza paret ayer, li inportan ki nou gagn permision editer-la avan pou ki nou kapav servi li dan nou materyel. Sak oter pou gard kopirayt lor zot bann text.
* Dat limit soumision pou bann text pou premie volim maniel Std 2 li le 11 Septam 2012. Pou deziem volim maniel Std 2, dat limit se le 11 Novam 2012.
* Pou bann text ki nou pou resevwar apre dat limit ou ki nou pa pou kapav servi pou maniel std 2, nou pou gard zot pou enn itilizasion evantiel dan bann materyel Std 3 amonte. Savedir ki ena bann text ki pa pou forseman paret dan maniel Std 2 me ki kapav paret dan materyel bann lezot nivo klas. Pou lemoman nou pa ankor fixe dat limit pou materyel nivo std 3 amonte.
* Panel redaksion maniel pou retranskrir tou bann text dan lortograf standar Kreol Morisien. Savedir ki mem si enn kontribiter pa metriz lortograf standar, li kapav avoy so text kan mem.
* Li posib ki panel redaksion maniel sigzer sertin modifikasion avan servi enn text dan maniel.
Bann diferan maniel Kreol Morisien pou distribie gratwitman dan bann lekol par Minister Ledikasion; li pa enn linisiativ komersial. Par konsekans, nou pa an mezir ofer okenn renimerasion a bann diferan oter ki ena dezir kontribie dan sa proze-la. Nou donn lasirans toufwa bann diferan oter ki dan okenn fason nou pa pou komersializ bann text ki zot avoy nou.
Si zot interese pou kontribie dan sa proze-la, zot kapav avoy nou zot bann text lor sa ladres-la : younitkreol@mieonline.org
Nou remersie tou bann oter ki finn manifeste dezir kolabor avek nou e nou invit zot pas mesaz-la a bann lezot kamarad ekrivin ki kapav interese par sa proze-la.
Nicholas NATCHOO.
Mauritian Kreol Unit
Mauritius Institute of Education
Réduit
Mauritius