Umar TIMOL : 2 TI ZISTOIRES.

ene zour dans ene pays ti ena ene ti zeness. li ti plito korek et li
ti plito zamoureu. ene zour line zamoureu ene zoli zoli tifi, bien
bien clair. tifi la aussi ti zamoureu, zot ti bien conten, zot ti bien
gate. astere la ene zour ti zeness dire li ki li envie marie are li.
tifi la repone li :

mai mo gate nu pas meme communaute nu. mo parents pas pu le.

ti zeness so le ker ine faire mal mais ki pou faire c'est la vie.
astere la pa fini, deux, trois l'annees pli tard line tombe zamoureu
ene zoli zoli tifi, bien bien brune. tifi la aussi ti zamoureu, zot ti
bien conten, zot ti bien gate. astere la ene zour ti zeness dire li ki
li envie marie are li. tifi la repone li :

mai mo gate nu pas meme communaute nu. mo parents pas pu le.

ti zeness pane decouraze. ene zour line tombe zamoureu ene tifi ki
exactemen kuma li, meme religion, meme communaute, meme couleur,
longitude, latitude tout pareil. tifi ti bien bien zoli. tifi la aussi
ti zamoureu, zot ti bien conten, zot ti bien gate. astere la ene zour
ti zeness dire li ki li envie marie
are li. tifi la repone li :

mai mo gate nu meme communaute mai to pa assez religieux. mo parents pa pu le.

ti zeness pane decouraze meme, line alle dans temp / masjid / legliz,
line enprane tou liv sacres, line prie fort fort et line vine siper
religieux. astere li alle guette zoli tifi ki li amoureu la, tifi ki
kuma nu kone exactemen kuma li, meme religion, meme communaute, meme
couleur, longitude, latitude tout pareil. et li dire li ki astere la
to kapav marie are mwa. tifi la reponde li :

mais mo gate nu meme religion mai to pa dan meme jamat/ ecole de
pensee / secte / caste ki mwa. mo parents pas pu le.

------


ene zour dans ene pays ki ti appell KUMA FAIRE ti ena ene ti garcon ki
ti appel KI FAIRE. pas kone pas ki mirak so nature ti different, li ti
ne ene lot kalite.

alorse ki sa pays la tou dimoune ti envi kone KUMA FAIRE li li ti envi
kone KI FAIRE.

et line bien souffert.

zenfan touzour line dimande so mama, papa, freres, sœurs, cousins,
cousines, KI FAIRE mais bann la ine dire li ki bizin dire KUMA FAIRE.

KI FAIRE mama ene zetoiles ? KI FAIRE papa dimoune mauvai ? KI FAIRE
sœur le monde existe ? KI FAIRE cousin bizin gaign boucou cash ?

Bann la guette li travers, clak li. To bizin dire mo garcon, KUMA
FAIRE. Dan nu pays kume ca ki bizin koz, kume ca ki to pou avance.

To bizin dire :

KUMA FAIRE pou tape cash ?
KUMA FAIRE pou protez nou bann ?
KUMA FAIRE pou comploter/ magouiller / mardayer ?
KUMA FAIRE pou rane nu superieur lezot dimoune ?
KUMA FAIRE pou diviz societe en castes, communaute, religions pou
gaign pouvoir ?
KUMA FAIRE pou achete gro gro loto kume ca nou kapav declare mari ?

KI FAIRE ine bien souffer mai li ti kone ki li pa pou kapav faire
narien. so nature ti kume ca, zamai li pas pu kapav vine kuma lezot,
zamai li pas pou kapav vine ene KUMA FAIRE.

ca ki li ti kapav faire, et ca ki line faire, cest ki line vine ene KI
A FAIRE. bann KUMA FAIRE pa kapav comprend ene KI FAIRE, li mette zot
trop mal a l’aise mai zot apprecie bann KI A FAIRE, banne dimoune ki
pas prend compte, ki na pa essaie comprend, bann dimoune ki ene daut
mots bien faire foute.

kan ene dimoune dimande li : KUMA FAIRE pou trik pou faire zenfan rent
dans bon lekol primaire ?

li reponde : KI A FAIRE.

kan ene lot dimoune dimande : KUMA FAIRE pou faire mo zenfan gaign
travay, ki minist bizin guette ?

li reponde : KI A FAIRE.

astere nu kamarad KI FAIRE ki vine KI A FAIRE ena so place dans societe.

li heureux.



Umar