Lanmou kréyòl

Do a liv-la : Siwo-Fiyèl, sé on krèy poèm an lang kréyòl, ka palé dè lanmou. Dépi prèmyé koutzyé-la ki ka chayé miyèl an tchè an-nou-la, tala i ka fè nou konmansé révé-la, jous dennyé pawòl-la nou ka voyé-la, délè pou on lenbé i pa-a fin menm.
Siwo-Fiyèl, sé on krèy poèm anlè dékatman a lanmou ka palé kréyòl. Kijan lang an-nou ka ba pi bèl santiman an-nou koulé jaden-flè anba kout penso a sòlèy douvanjou, lè nou ka fè bas an kréyòl. Kijan i ka fè pawòl an-nou fè sikdòj an bouch a doudou an- nou. Kijan i ka abiyé lenbé, ka jous rivé ban-nou plézi pléré lenbé an-nou lè nou rivé chapé anba a-y, san i rivé tchouyé nou, rann nou tèbè ou fada, fè nou tonbé adan dépalé an lari, o adan boulézon.
Siwo-Fiyèl, sé lanmou a lang an-nou, lang a lokans, lang a dé lanm, lang a langaj, toujou ka di on pawòl anba, toujou ni on sans séré, kon mèt a gwo-ka toujou fè nou tann. Sé bèlté a chimen-kochi, davwa lang an-nou toujou bwazé pou-y palé byen, pa jen maché dwèt pou-y vansé lwen.
Siwo-Fiyèl, sé on fwi lang an-nou pòté ba toutmoun, pou nou lanbé-y san bénékaké, é pou nou lésé-y désann an fal an-nou pòté fòs ban-nou plézi : fòs pou nou di an lang an-nou tousa nou vlé di, é plézi pwan tan li-y é vokalisé-y. E vinvwè lang an-nou té ka rann lanmou bèl kon wòb-a-kò ka zayé kò a Négrès maté a mi ta-w, mi tan-mwen ?
Lè rivé pou on ti siwotaj...
Auteur(s) : Ogis (Berthely) M'Bitako
Parution : 2004
ISBN : 2-9521502-0-6
Editeur : Mwenmenn-anmwen
Info+ : disponible en VPC - 06 90 38 16 25 - Mail
Menm sijé : Yon langay pou rakonté lanmou