Asefru n Muhya

Petit poème de Mohya pour tous les fideles du blog:

A MUḤ N MUḤ 

A Muḥ n Muḥ, wwet aqabac,
Si zik n zik, tabaε ulac,

Aqabac γef tayett-is,
Rebbi yerza-s ul-is,
yezgga yetnewwa,
Zik i yerfed iman-is,
Akken ad iṣubb γer lexla,

Ad yenqec timeγrusin,
Ad yefres akk tizemrin,
Inn-as kkan : «yya»,
Ad ak-yecrew tiselnin,
Ad yekrez ma d tayerza,
A Muḥ n Muḥ, wwet aqabac,
Si zik n zik, tabaε ulac,
Aṭas i yeswan tidi-s,
Illeqeḍ deg wusan-is,
D anebdu, d cetwa,
Akken ad d-isis aγrum-is,
Aγrum n tmara daya,

Ur tselleḍ yeţţusu,
neγ ad ides, neγ ad yettru,
Lukkan am netta,
Ur yettasem, ur ireffu,
Ur yettawi seg wa γer wa,

A Muḥ n Muḥ, wwet aqabac,
Si zik n zik, tabaε ulac,

Asmi yewweḍ tameddit,
Yečča ayla-s di ddunit,
Yenser s tufra,
Aqabac-nni yeddem-it,
Iṛuḥ ad yeγz aẓekka,

Iṛuḥ ad yeγz aẓekka-s,
Yettnaγ yiḍ d was,
Isenned, itekka,
yugad ad lummen fell-as,
ulac iwumi yenna...

A Muḥ n Muḥ, wwet aqabac,
Si zik n zik, ulac tabaε ...