Anil GOPAL (Île Maurice)

ENN VIZYON

“Oté, oté kamarad

Prêt inpé la min

Done inpé la min

Ed demoun inpé.”

Axel Gauvin

Pu Azaghen

Dan enn bis ranpli ar pasaze,

Deborde ar transpirasyon.

Dan enn sofa ser-sere,

Mo tom dan enn vizyon …

Enn vizyon drol, byin drol.

Enn vizyon diferan

Anvahi mo lexistans fol.

Enn vizyon pran mwa kuma zanfan.

Dan enn bato, mo vwayaz dan lesyel.

Anba lemond ver,

Zarb grat-syel,

Fuzer tu kuler.

Zom, fam, zanfan ere,

Larm ti kul kuler lazwa.

Grander ti truv dan lamitye.

Fraternite ti vinn lafwa.

Travay ti fer san laswer,

Travay ti fer san explwatasyon.

Fam ti’anfant san duler.

Personn pa ti sibir tantasyon.

Tu dimunn ti ris

Ar lamur sinser.

Zot ti dilit tu zimaz tris.

Zot ti kit tu kazye peser.

Tu zom ti kuler Bondye

Ek zot ti’aroz karo fraternite.

Tu zom kontan Bondye.

Lemal pa ti’existe.

Tronp-la tro for.

Sekus-la tro vyolan.

Frin fer resor … indiferan !

Anil Rajendra GOPAL