tanbou kanaval frape. tout nòt mizik vin cho
pase leve danse. plezi gen tan sou, gaye jouk
l’ap kilbite kapote fè tèt tout moun cho. fè tèt
moun vin klin, pwòp tou, san strès, san chagren.
ren deboulonnen vire won nan tout son. tout
voum se do . ou pa konn kiyès ki yes.
twapa ak zoreken lage nan fif malandren
zoboukechen pou l pal antre nan kè bann
toucho toubouke ap pouse do, kage, fè gagann
chavire gaye grès plezi madigra nan san anvan
monpè fè kwa sann abtinans sou vyann mèkredi dèsann.
an kòtchemiz san levit chaloska ap kwaze leuit,
make pa tiwouslo, fè mokwaze bouchon kola
pale langaj ak son panyòl pou eksplike :
‘’ atar a la rata’’ oswa ‘’Anita lava la tina’’sa se
palendwòm espayòl lòtbò fwontyè pou fè moun li
dechifre tout mo pwezi adwat àgòch san pwoblèm.
bò isit, sòti Wanament rive Okap, lè plezi pran chè,
« pèp » la koupe « anana » jouk « nan nannan » pou
ba w plizyè tranch palendwòm kreyòl ou ka li nan tout
sans; bon mo kaliko sandevan san dèyè kap pran plezi
amizman kanaval nan degizman tenidadan antre ladann
tout longè pou depatya w ak bon frap cho nan tyouwaw.
podiab ! Tifi fisèl ki fè fòlòp sove kite dòtwa kay mè
pou l al pran plezi kanaval bòdemèrr. l’al fè enpridans
bese pwenti apik ranmase grenn chaplè l ki degrennen
nan mitan bann cho san gade kote l’ap met pye l, san pran
prekosyon ak moun bò kote l, ak twou dèyè l, janmdebwa
pase, janbe l dechalbore l.
mo kanaval alèkile se mo gwo zo , yo pa mèg. ke yo kreyòl, ke
yo franse, yo danse sou nòt mizik san kolòn vètebral, san rèl do.
se gwo mo nen kraze ak vwa gede k’ap defile an dezabiye san zip devan.
tout moun sonje « métaphore » met afè w ,
nan nannan « palindrome » kreyòl. E, m parye avè w
si « Calembour » bossa ta retounen chante nan fènwa
lakay ou aswè a , li tap wè yon lanp limen . mo kanaval
se kouto fonmasi. yo file debò pou yo amize lespri.
Emmanuel Albert (Toto)
Jeu de briques
Snake
Pacman
Bubble